“د افغانستان په راتلونکې کې زموږ ونډه”علمي او څېړنیز کنفرانس پرېکړه لیک

بسم الله الرحمن الرحیم

“د افغانستان په راتلونکې کې زموږ ونډه”علمي او څېړنیز کنفرانس پرېکړه لیک

اګست ۲۰۱۵

وین – اتریش

موږ یو شمېر لیکوال، سیاسیون، فرهنګي شخصیتونه، په هېواد کې او له هېواده د باندې د مدني ټولنې غړي په اتریش کې د افغان فرهنګيانو ټولنې، په اروپا کې د افغان ځوانانو د رهبرۍ او له افغان کډوالو سره د مرستندویه ټولنې او د بانو مجلې رهبري هیئت له خوا، د سیاسي او نظامي اکاډمیک شخصیتونو، په اروپا کې د مدني ټولنې غړو، لیکوال او هنرمندانو په حضور کې په هغه علمي او څېړنیز کنفرانس کې چې د افغانستان په راتلونکې زموږ د ونډې په اړه جوړ شوی و، په هېواد کې ملي منافعو د تحقق، ټولنیز عدالت پلې کېدو، د بیان ازادۍ د پیاوړې کېدو او خپلو ګرانو افغانانو د ژوند د بهبود لپاره لاندې پرېکړه د خپلو وروستیو غوښتنو په توګه خپروو.

۱ـ دا کنفرانس د افغانستان د ملي یووالي حکومت څخه هیله لري چې د افغانانو د ښه ژوند لپاره خپلې ګډې ژمنې د امنیت، ثبات او ډیموکراسۍ په برخه کې عملي کړي.

2ـ د ټولنیز اړخونو سربېره په اقتصادي او سیاسي برخو کې د ښځو ونډه ډېره مهمه او افغان حکومت باید د هغو ښځینه ضد فکرونو په اړه عامه پوهاوی له لېرې پرتو سیمو پیل شي، څو افغان میرمنې د خپلو نارینه وو سره اوږه په اوږه د خپل هېواد د ابادولو په برخه کې خپل رسالت اداء کړي.

۳ـ له دیني عالمانو په جدي توګه د ملي روحیې د پیاوړي کېدو، د جاسوسي کړیو د ورکېدو او د وسله والو طالبانو پر ضد د تبلیغ په برخه کې ګټه پورته شي، څو له دیني اړخه دا کسان د افغانستان د دښمنانانو په توګه وپېژندل شي.

۴ـ له افغانستان سره د امنیتي تړون له مخې د امریکایي دولت هیله کېږي چې د پاکستان پر وړاندې اقتصادي تحریمات وضع او په افغانستان د پاکستان د لاسوهنې په اړه جدي ګام واخلي. همدارنګه به دا کار وکړای شي چې پاکستان د ترهګرو له تمویل او تجهیز لاس واخلي او د القاعده، طالبان، داعش، حقاني او نورو اورپکو ډلو له ملاتړ لاس په سر شي. هیله مند یو چې په افغانستان کې وروستیو بریدونو ته په کتو او په دې برخه کې د پاکستان له ښکاره مداخلې وروسته نړۍ واله ټولنه په دې برخه کې لاس په کار شي.

۵ـ تر هغه چې موږ د خپلې خاورې ساتنه خپل فرض ګڼو؛ نو د هغه توافق له مخې چې د امریکا له متحده ایالاتو سره شوی باید افغان امنیتي ځواکونه د ۱۹۸۰ میلادي په څېر تمویل، تجهیز او ملاتړ یې وشي. همدارنګه دې د هېواد د هوایي ځواک پر پښو درېدو لپاره کوټلي ګامونه واخیستل شي.

۶ـ له دولتي چارواکو، قومي مشرانو، کورنیو او په ټوله کې د ټول افغان وګړو په درنښت هیله ده چې د ملي یووالي او یو ملت کېدو لپاره د عامه پوهاوي لپاره پروګرامونه په لاس کې ونیسي او دا کار د خپل یو تاریخي مسولیت په لاره واچوي.

۷ـ د ټولنیزتوب او ملي یووالي فرهنګ پرمختګ، سوکاله ژوند، یووالي، فکري بدلون، شایسته سالارۍ، ولسواکۍ او د ملي هویت د پېژندګلوۍ لپاره لار اواروي، ولې متاسفانه په افغانستان کې موږ له کلونو راهیسې په دې برخه کې د یوې ځانګړي پالیسۍ تشه احساسوو؛ نو دې لپاره باید د ټولنې د یووالي او یو فرهنګي مرکزیت جوړېدو لپاره هر اړخیز ګامونه پورته شي.

۸ـ ازادې او خپلواکې رسنۍ په هېواد د اصلي فرهنګ د ترویج لپاره د یو مهم رکن په توګه له ځانګړي ځای برخمنې دي، له دې کبله په هېواد کې د مختلفو متعهدو رسنیو نه غوښتنه کوو چې په هېواد د خپل اصلي فرهنګ د دودولو، د دښمن پر وړاندې د ملي یووالي، په حکومت بنسټونو کې د شایسته سالارۍ او د هېواد د قومونو ترمنځ د وحدت لپاره د عامه پوهاوي پروګرامونه په لاره واچوي.

۹ـ افغان کابینه، ارګ او امنیتي ځواکونه باید د پردیو د جاسوسي کړیو څخه پاکې شي او همدارنګه مشکوکې مدرسې او ښوونیز بنسټونه باید په ټول هېواد کې وتړل شي.

۱۰ـ د خپل هېواد پر وړاندې مینه، وفاداري او د خدمت زده کړه باید له ښوونځیو ماشومانو ته زده کړل شي. د پوهنې او لوړو زده کړو وزارت څخه هیله کوو، څو د ملي یووالي د پایښت او د هېواد د دښمنانانو پر وړاندې مبارزه په ټولو شخصي او دولتي ښوونیزو مرکزونو په لاره واچوي.

په درناوي

((د افغانستان په راتلونکې کې زموږ ونډه)) د علمي او څېړنیز کنفرانس ګډونوال

۲۲ اګست ۲۰۱۵ وین ـ اتریش